sábado, 20 de decembro de 2014

Feliz 2015!!



venres, 19 de decembro de 2014

Nadal Solidario

En tempos de crise hai que botar unha man a quen máis o está a necesitar, e dende hai xa uns anos a nosa solidariedade nestas datas está cos veciños e veciñas do noso Concello 

A 3ª Chocolatada Solidaria, que celebramos hoxe como remate do trimestre, e a recollida de alimentos, que levamos a cabo durante toda esta semana, amosaron a sensibilidade dos membros da nosa Comunidade Educativa, os verdadeiros artífices de que este tipo de iniciativas saian adiante. 

E non hai Nadal que se prece que non reciba a visita de Papá Noel e nós, non íamos a ser menos, non si? Un Papá Noel que chegou cargado de caramelos e de bos desexos para o vindeiro 2015.








mércores, 17 de decembro de 2014

Visita ao Museo do Humor e á BPM de Fene

Esta mañá, e como xa ven sendo habitual dende hai anos, como remate ás actividades do primeiro trimestre, a rapazada de 1ºESO foi de visita ao Museo do Humor e á BPM de Fene,

Recibiunos Almudena, a coordinadora do Museo do Humor, quen nos tiña organizado un extraordinario percorrido polas distintas salas do Museo. Comezamos na sala dos espellos e, a partir de aí achegounos á figura do seu fundador o debuxante Xaquín Marín Logo pasamos polas distintas salas do museo, a sala da Banda deseñada, a do Humor negro..., un xeito de achegarnos á figura dos principais referentes do humor gráfico galego, nacional e internacional. 

Foi unha hora chea de risas e moi bo humor que rematou cunha proposta ben creativa. Partindo da obra "Cabeza Galega" do xenial Xaquín Marín, a rapazada debía debuxar outra cabeza que levara algo humorístico. E vaia que se deron renda solta á súa creatividade. Nuns días, unha vez escaneadas as súas obras, subirémolas ao blog e veredes canto artista hai no Segrel... Na despedida, Almudena agasallounos a todos cunha cinta para colgar o móvil ou as chaves, e para a nosa Biblioteca, un cartafol que inclúe once láminas con debuxos de humoristas gráficos e ilustradores galegos que fan referencia ao 30 aniversario do Museo, unha pequena xoia que axiña teredes á vosa disposición nos fondos do Segrel.

Despois pasamos á biblioteca onde Sara nos explicou a súa organización así como os distintos servizos que se ofrecen aos seus usuarios. Como remate á visita tíñalles organizado un concurso que os fixo correr polas distintas seccións da biblioteca en busca da información que se lles pedía. Os gañadores levaron como agasallo un exemplar de "Chrystyan Magic. Atrapado na torre" e un marcapáxinas, e todos os asistentes unha libretiña da Biblioteca.

Como despedida visitamos a extraordinaria exposición de caricaturas "Pola cara". Unha exposición que se inaugurou durante a celebración do XXX aniversario do Museo e que non debedes perder!!


O noso agradecemento a Almudena e a Sara pola magnífica xornada. Volveremos!!


martes, 16 de decembro de 2014

II Xornadas de Tradición Oral "Antón Castro"

Continúa no Segrel a celebración das II Xornadas de Tradición Oral. Nesta ocasión foi Antón Castro, extraordinario músico e contador de historias, un grande do noso país cando se fala de oralidade, quen nos achegou á riqueza da nosa tradición oral. Un encontro cheo de música, risas e contos que fixeron patente na biblioteca do Segrel "a maxia da oralidade".

O noso agradecemento a Antón, a súa visita foi un marabilloso agasallo, nesta semana festiva na que estamos a celebrar a chegada do Nadal, para o alumnado de 2º e 3ºESO!!

martes, 25 de novembro de 2014

II Xornadas de Tradición Oral: As Regueifas


Comezaron as II Xornadas de Tradición Oral no Segrel e fixémolo dun xeito inmellorable, achegando á rapazada a unha tradición cultural e lingüística milenaria, as Regueifas, da man dun dos mellores regueifeiros do país, Josinho da Teixeira

Josinho falounos da orixe da Regueifa, da súa medida, a rima e o ritmo. Un obradoiro que nos soubo a ben pouco, case que dúas horas que se pasaron nun suspiro, ou mellor dito, nun "Tara riro riro riro" e no que grazas a Josinho, un mestre na arte do inxenio e a improvisación, descubrimos algúns verdadeiros artistas entre a nosa rapazada, entre eles Julián, alumno de 2º ESO, quen compuxo unha regueifa que mereceu os parabéns do mestre.

Grazas Josinho, ata a próxima!!

Velaí tedes unha mostra de como transcurriu unha tarde de música, risas e festa no Segrel.



Unidade Didáctica As Regueifas 
Elaborada polo grupo de profesorado da Biblioteca O Segrel
 
Álbúm fotográfico da Xornada

luns, 24 de novembro de 2014

A Semana dos Xogos de Mesa Tradicionais

A pasada pasada no Segrel celebramos a Semana dos Xogos de Mesa Tradicionais e foi todo un éxito. Por primeira vez, durante os recreos, os ordenadores da biblioteca quedaron sen usuarios... non é que nós sexamos contrarios a o uso das novas tecnoloxías da información e a comunicación, pero gozamos moitísimo comprobando que cando á rapazada de todas as idades, dende 1º da ESO ata 2º de Bacharelato, cando se lle ofertan novas posibilidades no seu tempo de lecer a súa resposta é extraordinaria.

Ana e Suso, veciños e usuarios do Segrel (Suso é membro do noso club de lectura de pais e nais dende a súa creación, as súas dúas fillas Iria e Aldara, foron alumnas do noso centro), propietarios da empresa Buxaina, (dende O Segrel apoiamos as tendas do noso barrio, ao pequeno comercio e aos emprendedores) o pasado luns chegaron  cargados de maravillosos xogos de mesa e logo dunha pequena presentación onde nos falaron da súa historia e evolución comezamos a xogar.

Durante unha semana o Carron, un dos xogos de mesa máis antigo que se coñece, moi popular na India e o favorito do noso alumnado máis novo; o Muíño, a súa orixe remóntase ao Imperio Romano; as Damas chinesas, que teñen a súa orixe na Alemaña do século XIX; o Chaturanga, orixinario da India e considerado o avó do xadrez, foi un dos pedidos polo alumnado de bacharelato..., o Surakarta, orixinario de Indonesia; o Alquerque, a súa orixe remóntase ao antigo Exipto; o Tablut, de orixe viquingo; o Bagh Chal, tradicional do sur de Asia e que, aínda hoxe, goza dunha grande popularidade en Nepal; o Ritmomaquia, xogo de cálculo matemático que ten a súa orixe na Idade Media; o Parchisi, precursor do Parchis e un dos xogos de mesa máis importantes da India, o Senet, inspirado no Senet de Amenhotep III que hoxe se exhibe no Museo de Brooklin en Nova York; Cans e Chacais, do Antigo Exipto e un dos xogos de mesa máis antigos que se coñecen, e moitos máis...

Como podedes comprobar, durante a semana que dende Buxaina nos achegaron a esta fantástica colección, xogamos e viaxamos no tempo por distintas culturas. Unha semana que non nos chegou a nada e xa estamos esperando, como auga de maio, que nos chegue o pedido co que O Segrel quer agasallar aos seus magníficos "visitantes" (non nos gusta nada o termo "usuario"!!).

Velaí tedes unha mostra do que aconteceu nesta última semana no Segrel.

Álbum fotográfico

venres, 14 de novembro de 2014

Jorge Mira "A Ciencia no Punto de Mira"


Con motivo da celebración do Mes da Ciencia en Galego, coa intención de poñer en valor o uso do galego no ámbito científico e de contribuir á investigación desenvolvida na nosa lingua, e dentro do programa "Fene coa ciencia en galego", o catedrático da área de Electromagnetismo do Departamento de Fisica Aplicada da USC, Jorge Mira, impartiu unha charla "A ciencia no punto de Mira" no IES de Fene.

Esta é a crónica feita pola rapazada:

"O pasado mércores, Bachiller e 4º de ESO asistimos a unha charla do famoso Jorge Mira, que, como el mesmo comentou, se lle coñece noutros centros aos que asistiu por "el matemático de Cifras y Letras". Despois dunha emotiva introdución dun dos nosos ex-profesores, Antonio Orozco, puidemos coñecer que este ano é a primeira vez que se celebrará o Mes da Ciencia en Galego, e ese é un dos motivos polos que ambos estaban alí.

Fixo un comezo explicando a evolución da reprodución, tanto animal coma humana: Parece ser que, nun principio, o aparello reproductor masculino non tiña a forma que hoxe coñecemos nunha gran parte das especies, o que dificultaba o acto sexual. "A natureza atopou entón o sexo. Que eso non significa que atopara unha páxina porno", concluíu con retranca.

 A importancia do pelo púbico, as recentes preferencias faciais dun home ante as mulleres, a venda que a publicidade fai dun corpo feminino anoréxico e con peso excesivamente baixo, ou unha explicación de que as mulleres están inconscientemente máis atractivas nos días de ovulación foron unha parte dos temas tratados. Explicado dunha forma moi dinámica e fresca, Jorge foi capaz de atraer a atención de todos e relatar as cousas con exemplos divertidos e sinxelos de entender, ademáis de asegurarnos con datos de todo tipo as cousas que nos estaba amosando.

 O tempo foi curto, así que a parte final quedou para unha das súas maiores anécdotas como científico. Querendo comprobar xunto a un amigo unha estrofa de Isaías, da Biblia, que falaba sobre o ceo, amosaron con probas que o Ceo estaba máis frío ca o Inferno, e o publicaron nunha importante revista inglesa. Poucos días despois, Mira recibiu unha chamada dunha inglesa. "Tiña un acento moi raro", dixo a súa nai; "Pois debe de ser de Camariñas", dixo responder el cando aquilo sucedeu, un chiste que os da Costa da Morte podemos entender moi ben. A xove aseguraba que o seu artículo era erróneo, pois facía anos un científico inglés calculaba que era o Ceo o que estaba máis quente ca o Inferno. A escandalosa nova apareceu en multitude de revistas e xornais españois, italianos e alemáns, e os pobres tiveron que facer un novo texto onde disculpar que a quen estaban rebatindo era ao personaxe da Biblia, e non ao outro señor.

 En resumo, a charla foi grandiosa. Repleta de datos interesantes que non se explican nos libros de texto, amena, fácil de entender, levadeira... Definitivamente foi unha conferencia que tumbou ao estereotipo de charla aburrida, e asegurou unha forma eficiente de reflexarnos algunhas cousas da maneira máis natural posíbel. Ogallá se puidera repetir a experiencia, todos quedamos con ganas de máis!"
Mariña Gándara 1º Bacharelato

"Hoxe tivemos unha charla co catedrático Jorge Mira. Sinceramente, foi a mellor charla que tiven nunca. Xa que conseguiu que non nos aburrísemos en ningún momento.

Jorge falounos de moitas cousas relacionadas coa ciencia, pero a parte que máis me gustou foi cando falou das modelos de hoxe en día, xa que a súa masa corporal media estaría en tercer grado de desnutrición, algo horrible que non entendo como se permite na nosa sociedade. E ahí é cando Jorge di una frase que me encantou: “ Están turpando a súa esencia”. Con isto refírese a que non a tratan coma mulleres, senón coma perchas colgantes.

Outra cousa que me pareceu moi interesante foi cando falou dun traballo que fixera cun compañeiro seu sobre a temperatura á que estaba sometida o ceo e mais o inferno. Cando o remataron, a Jorge chamoulle unha rapaza dende Canadá dicíndolle que ese mesmo traballo o facera un tal David Allan, pero con calculara mal e isto causou unha gran polémica medíatica por todo o mundo.

Finalmemte gustoume os premios nobels que foran otorgados a descubrimentos moi curiosos.

Jorge fálanos do seu novo libro " A ciencia no punto de mira" e danos o seu tweeter : @JorgeMiraUSC."
Miriam Martínez 4ºESO

"A min en particular, gústoume moitisimo esta charla porque penso que todos os aspectos a tratar, eran uns temas moi divertidos e el soupo chegar a todo tipo de persoas, tanto ao profesorado, coma ao alumnado do centro e isto fixo que a sua presenza fora tanto didáctica como divertida. 

De verdade que me encantou e pareceume moi simpatico. Gustaríame que un día volvera para poder falar e aprender moito máis desta forma tan divertida!"
Noa Rascado 4ºESO

"A miña opiniòn persoal sobre a visita do Físico galego Jorge Mira ao noso Instituto fascinoume xa que a física é unha das miñas materias favoritas e tamén porque os temas que abordou na charla me encantaron, a pesar de que o tempo fose pouco."
Marcos Varela 4º ESO




mércores, 5 de novembro de 2014

Exposición "O Pazo de Barallobre e o Pintor Antonio Jaspe"

O alumnado de 4º ESO, visitou a Exposición "O Pazo de Barallobre e o Pintor Antonio Jaspe" que ata o día 13 permanecerá aberta no local da Liga de Amigos. 

A exposición, que foi comentada por Enrique Sanfíz, realiza un percorrido pola edificación señorial do Pazo de Barallobre, construido en 1591 e derrubado en 1979 no lugar onde foi construido o IES de Fene. Tamén recolle boa parte da obra do pintor romántico de Barallobre Antonio Jaspe Moscoso, que conta con cadros no Museo de Belas Artes da Coruña, Museo de Pontevedra e Museo Jovellanos de Gijón.

luns, 20 de outubro de 2014

Biblioteca Escolar... Matemático!!!

O mes de outubro, mes declarado pola IASL (International Association of School Librarianship) como Mes Internacional da Biblioteca Escolar. O obxectivo é facer visible a importancia da biblioteca escolar e difundir a súa potencialidade como factor de calidade do ensino nos centros educativos.  

O lema deste ano é "Biblioteca Escolar... Matemático!!!" un lema que pon énfase no papel imprescindible da biblioteca escolar e tentando espertar o interese polas matemáticas.

O ilustrador David Pintor foi o encargado de deseñar o cartel da campaña deste ano.

Con este motivo dende a nosa biblioteca organizouse unha exposición onde se recolle unha ampla selección de literatura (novelas, poemas...) e cine que trata o tema matemático. Aos nosos fondos engadimos a Maleta Viaxeira Matemática que dende  a Asesoría de Bibliotecas Escolares poñen a disposición de todos os centros educativos como un servizo de préstamo temporal.

Exposición que completamos cunha pequena mostra sobre Mauritis C. Escher baixo o título "A maxia do imposible". 

Así mesmo algúns grupos da ESO e de Formación Básica, visionaron películas como "Los crímenes de Oxford" e "Contact"

mércores, 8 de outubro de 2014

Os Clubs de Lectura do Segrel botan a andar!!

Así é. O vindeiro martes día 14 teremos a primeira sesión do club de lectura de 1ºESO e o martes 21 a de 2ºESO, así como a de pais e nais. 

Este curso, debido á grande demanda, temos apuntados 50 rapaces e rapazas dun total de 78 matriculados nestes dous cursos, decidiuse, para facilitar os encontros, que as reunións non fosen conxuntas polo que nos foi imposible ofertalo ao resto da ESO, dada imposibilidade de atendelos.

Canto o sentimos!

Os títulos elixidos este curso son:
Club de 1º ESO
  •  Sierra i Fabra, Jordi “El asesinado del profesor de matemáticas” 
  •  Docampo, Xabier “Cando petan na porta pola noite” 
  •  Cimadevilla, Fernando “O ladrón de soños (O mundo secreto de Basilius Hoffman I)”
  •  Castro, Carlos de “La casa de la linterna” 
  •  Gleitzman, Morris “Una vez”   
  •  Gómez Cerdá, Francisco “Eskoria” 
  •  Gallego, Laura “Las hijas de Tara”   
Club 2º ESO
  • Silei, F, Quarello M. “El autobús de Rosa”
  • Pratt, Hugo “Corto Maltés” 
  • Guarnido, J., Díaz Canales, J “Blacksad” 
  • Dorison, X, Lauffray, M. “Long John Silver” 
  • Tomás, Xosé “Nomades”
  • Brami, E; Jeunet B. “Sálvate Elías “ 
  • Innoccenti, R; Vander Zee, R. “A historia de Erika” 
  • Roca, Paco “Arrugas” 
  • Innoccenti, Roberto “Rosa Blanca“ 
  • Satrapi, Marjane “Persépolis" 
       Club de Pais e Nais
  • Feijoo, Pedro “A memoria da choiva”
  • Grandes, Almudena "Las tres bodas de Manolita"
  • Belli, Gioconda "El país de las mujeres"
  • Camilleri, Andrea "El beso de la sirena"
  • Fernández Paz, Agustín “A viaxe de Gagarin”
  • Hosseini, Khaled "Y las montañas hablaron"
  • Navarro, Julia "La Biblia de barro"
  • Garrido, Vicente; Nieves Abarca "Crímenes exquisitos"
  • See, Lisa "El abanico de seda" 
  • Redondo, Dolores "O gardián invisible"
Unha noticia, que foi difundida esta mañá a través de Radiofusión Fene, a nosa radio local, cun titular ben fermoso "No IES de Fene a lectura é unha gozada"

Esperámosvos!!

domingo, 28 de setembro de 2014

El templo de las mil puertas

Unha fantástica revista on-line de literatura xuvenil que vos recomendamos se queredes estar ao día das últimas novidades literarias e moito máis.

Clica na imaxe e abriránseche esas mil portas!

http://www.eltemplodelasmilpuertas.com/revista/41/

domingo, 21 de setembro de 2014

Comezamos!!

Así é, xa estamos de volta, e que mellor que facelo cun decálogo para que o curso sexa moito máis doado...
Vía

xoves, 19 de xuño de 2014

Suxestións de lectura, cine e música

Por un verán cheo de fermosos momentos de lecturas compartidas

venres, 13 de xuño de 2014

"Gozando a Poesía" - "Enjoying Poetry"

Durante este terceiro trimestre en 3ºC (PDC) e en 4ºA  na materia de inglés o Proxecto "Enjoying Poetry" tiña como principal obxectivo o achegamento á poesía. 

Andivemos á pescuda de Acrósticos, Haikus, Poemas Dada e Caligramas, e á vista das conclusións da rapazada esta aventura poética foi divertida e ese achegamento foi, para eles, moi novidoso e os sorprendeu moi positivamente.

Velaí algunhas das opinións do alumnado de 4ºESO.

[Despois da visita de Raúl aprendemos que a poesía pode ser doada de entender. Aprendemos tamén que a poesía non é so versos e estrofas, e que podemos facer poesía con ideas sinxelas, incluso se non  somos escritores profesionais." (Noelia e Sarai)

"Finalmente, debemos agradecer a poetas e escritores como Carlos Negro e Raúl Vacas que nos amosasen unha idea distinta do que é a poesía a través dos seus obradoiros e que nos fixesen gozar escribindo poesía."(Juan e Sergio)

"Ao principio do proxecto pensamos que sería moi aburrido, pero agora estamos de acordo en que non foi un mal tema, tendo en conta que realmente non nos gusta ler poesía. Debemos admitir que foi un proxecto interesante co que aprendemos cousas diferentes." (Miriam e Cristina)

"Ao principio asustoume o proxecto, porque non me gusta a poesía en español e  pensei que en inglés sería moito máis difícil, pero finalmente debo recoñecer que me gustou porque este proxecto foi bastante divertido." (Joel)

"Ao principio non estaba encantado coa idea de facer un proxecto sobre poesía durante o terceiro trimestre. Non odio a poesía, pero non me gusta tanto como a narrativa. Tería preferido un proxecto sobre un tema libre. Sen embargo, non estivo mal de todo. Divertinme facendo Haikus, Acrósticos, Caligramas, pero non Poemas Dada, porque son un pouco difíciles. De todos xeitos gustoume facer este traballo. […] Dende o meu punto de vista, moitos dos meus compañeiros teñen gozado coa poesía aínda que non  o admitan. De feito, penso que a maioría fixo un bo traballo e escribiron uns poemas fantásticos. Este proxecto nos dou unha visión diferente da poesía, moi diferente dos poemas que vemos na clase de lingua." (Carlos)

"Con  este proxecto coñecemos distintos tipos de poesía. Aprendemos a escribila, a sentila e a gozala. Tamén aprendemos que a poesía pode ser divertida e interesante e que no é esa cousa aburrida e sentimental que a xente soe pensar. Aprendemos a apreciala e a amala." (Andrea e Ruth)

"Antes de comezar o proxecto pensabamos que sería difícil e aburrido, pero ao final foi interesante e divertido" (Alex e Raúl)

 "Cando soubemos que o proxecto do terceiro trimestre sería sobre poesía, vin caras de desaprobación entre os meus compañeiros, pero eu non era unha deles. Pode ser porque ás veces leo poesía, ou  porque sabía que a poesía é algo máis do que nos imaxinamos. Creo que non lles gustaba porque non a coñecían. Hoxe, saben máis e penso que case todos nós temos unha opinión distinta e un maior coñecemento sobre a poesía do que tiñamos ao principio" (Antía)]
Tras o Encontro con Raúl Vacas, se lles propuxo deseñar un “envase” no que presentar os seus poemas a esa persoa especial nas súas vidas, e practicamente todos aceptaron o reto.
O resultado non puido ser máis creativo… 

Flores e bolboretas voadoras para achegar a unha irmá os nosos afectos dun xeito diferente, as pílulas desa avoa que nunca esqueceremos, un xogo poético para un amigo moi especial, un haiku agochado nun móbil para ese amigo que non se separa del..., todos eles extraordinarios. E cantas emocións contidas mentres nos presentaban os seus fermosísimos "envases poéticos".
Alguén dixo que esta xuventude non aprecia  poesía e que as escolas matan a creatividade? Non sempre adoita a ser así, non sempre... So hai que ver a súa resposta cando conseguimos enganchalos.
Parabén rapaces, foi un verdadeiro placer facer o camiño da ESO ao voso carón. E despois de catro anos xuntos teño que confesarvos que vos botarei en falta, non sabedes canto!!
Todo o mellor na vosa nova andaina!!

martes, 20 de maio de 2014

Unhas Letras de Lenda

Este ano, o día das Letras Galegas  dedicámolo á literatura oral. Como  na materia de  lingua inglesa en 1ºESO estamos a facer un Proxecto documental sobre lendas do mundo, decidimos dedicar o día a contar lendas do noso país, esas lendas que nos contaron os nosos avós, os nosos pais e que tanto nos gusta contar e que nos conten. 


O alumnado decorou a biblioteca, non faltaba detalle para darlle un ambiente de lenda, incluso algúns deles vestíronse para a ocasión.  Foi un mañá chea de misterio Por alí estiveron  a Santa Compaña,  Santa Comba,  San Andrés de Teixido, Roxín Roxal e a Ponte do Porco, o Arco de San Lorenzo, a Lagoa de Doniños e un sen fin delas máis…


Tanto gozamos con esta experiencia que o vindeiro curso pensamos organizar unha semana enteira á tradición oral. Que vos parece a idea? A nós encantounos!

Se estades interesados nas nosas lendas, non deixedes de visitar Galicia Encantada!

luns, 19 de maio de 2014

Día das Letras Galegas


Museo Belas Artes

O martes 19,  as actividades de celebración das Letras trasladámolas á Coruña.  Comezamos cunha visita ao “Museo de BelasArtes”, onde  nos achegamos á obra de artistas galegos como Luis Seoane, Villaamil…, logo  fixemos un  “Itinerario  de  escritores  galegos”, estivemos na  casa de Rosalía, nos monumentos, nos Xardíns de Méndez Núñez, a Curros Enríquez, Castelao, Manuel Murguía e Pondal onde se leron distintos poemas como “Os mozos”, na primeira sé da RAG, na Cova Céltica e,  na  Praza do Humor  e na Praza de María Pita





 https://goo.gl/photos/XngXdtLDiuZp2Kwv6

Xa  pola tarde fomos ao Xardín de San Carlos onde lemos o poema The Burial of Sir John Moore after Corunna de Charles Wolfe e un fragmento do que  Rosalía lle  dedica  titulado  “Na tomba do Xeneral Sir John Moore” e visitamos  a  “RAG e a Casa-Museo de Dona Emilia Pardo Bazán”. Na RAG lemos varios poemas de Díaz Castro, entre eles “Penélope” e “Nimbos”. 


Unhas visitas moi didácticas que fixeron desta unha extraordinaria celebración dun dos días grandes no noso país, o Día das Letras Galegas.


Se clicades nas fotos veredes as reportaxes completas.

Related Posts with Thumbnails